لبنان صار بلاد الحكي للقهر والجوع والضجر

يا أبي، يا نسري الغالي،أكتب إليك اليوم، لا كابنة تشتاق إلى أبيها فحسب، بل كمحامية تحمل قلمها لتكمل رسالة رجلٍ ترك في الكلمة موقفا، وفي الفكر أثراً، وفي قلوب محبّيه محبةً لا يطويها الغياب.
أنشر لك اليوم مقالاً من أروع مقالاتك، لعلّ كلماتك تختصر واقع لبنان.

رحلت يا أبي، لكن مقالاتك لم ترحل، وكلماتك لم تصمت. سأظل أنشرها، وأحملها إلى الناس، وفاءً لك، وإيماناً بأن الكلمة الصادقة لا تموت، وأن صاحب الفكر الحر يبقى حاضراً في وطنه، مهما غاب جسده.
يا أبي، يا نسر حرمون. سيبقى قلمك شاهداً ستبقى كلماتك تحلق فوق وطنٍ أحببته، وحملت همومه .
ابنتك المحامية
دالية الخوري

مقال للبروفيسور الراحل: نسيم شفيق الخوري

البروفيسور نسيم شفيق الخوري يواجه واقع لبنان بقلمٍ لم يُسكتْه الغياب

“الحضارة” بـ لبنان يا جدّي جبال كذب طافحة بالسمسرات

وكعابْ كرتون عارية وكذب وسرقات متل ناطحات السحاب ورقصة القطارات

راكضة فوق القمر بالدشاديش وأبو الزلف وعَ بواب السفارات تبحث عن سفر

بلادنا يا جدّي بلاد الحكي الفاضي وولاد زعران سراقين بيتقاتلوا زغار، كتير كتير زغار ذبحوا بلادنا

بيتصالحوا تحت الدرج وبيقسموا الغلّة ع السكت

والناس سهرانة مع البرغش بِرَندِح بهالليل

ورضيع اللي إجا سايح ع لبنان عم يبكي من ريحة المطار

بالصفّ جانن ع كتف إمّو، وبتغيّر الكوش ع حضنها

وملبّكي وين بتخبي المحارم بجزدانها ولاّ بجيبتا

ولبنان حضارة النونو ما إلا عيون ولا سمع

وكإنّو ما فيها بشر

يا للمضحكي،

التغيير والثورات صارت لتّ الحكي قد ما بدّك على الشاشات

ماركس من قبرو صرخ حاج تلعبوا يا هَبَل تْرِكونا نموت شوي

نابليون عم يشرب بقبرو عَرَق وغيفارا صورة معلّقة بشاشات السمر.

صار لبنان بطن الحكي اللي ما بيخلّف إلاّ حكي.

صار وقت الدفع للتغيير وصار وقت القبض للعمر وللفقر وللتعتير.

وصار وقت إرفع صُبّاط لـ بنتي وحفيدي وفرفش بهالحكي

وما ملّ فيكم يا زعران بعد وقت الحكي والكذب بعدو بروسكم يا ناس؟

بعدو البلد متل سوسي بلبادة جدودكم من دهر

عايشين بالعتم

نحنا بعصر مصباح والكهربا إبن ولد صبّاح لا مقاوم ولا جنوبي

ما فهمنا منكم إنتصر ولاّ ما إنتصر

لبنان بعدو بِـ عصر الحجر: قْدَح الحجر

يا لبناني

وضوّي ديارك وإنقِبِر .

وبالزبالي طريقك، بْحَش وطم حالك يا صبي بعدك قبل عصر الحجر.

نوركم بعدو بلا زغرة متل قنديل النَوَر

وبتعملوها كل يوم تحت الشجر

بالمرجلي إنتو شعب بشع مثل الضجر

خلقتو للزجل والتبخير والكذب عَ مدّ عينك والنظر

مْعَمْشقين بسفينة نوح مثل قارة من غجر

بعدكم بلبنان طعم دايم للحيتان يا بشر

بعد ما السمك ببحركم نفق من جوع أو هجر

ما تغنّوا يا لبنان يا قطعة سما ويا بحر السمك

كُلوا أجسادكم

كُلوا ولادكم وكلوا لبنان من بعيد ولا تجوا وموتوا بعيد وغنّوا معو.

ارجعوا لا لا

لا ترجعوا

لبنان صار كومة صدف فاضي إلا من كذب السياسة والبشر.